نگرانی رییسان جمهور ایران و تاجیکستان از حضور و فعالیت گروه‌های تروریستی در افغانستان

خبرگزاری راسک: در حاشیه‌ی نشست مجمع عمومی سازمان ملل متحد در شهر نیویورک، رییسان جمهور ایران و تاجیکستان با‌هم دیدار کرده و نگرانی‌های شان را در رابطه به حضور و فعالیت گروه‌های تروریستی در افغانستان مطرح کرده‌اند.

رسانه‌های ایرانی روز چهارشنبه ۲۹ شهریور/سنبله، گزارش دادند که ابراهیم رییسی، رییس جمهور ایران و امام‌علی رحمان، رییس جمهور تاجیکستان روز گذشته در نیویورک با هم دیدار کرده‌اند.

براساس گزارش خبرگزاری صداوسیمای ایران، رهبران دو کشور ضمن این‌که از حضور و فعالیت گروه‌های تروریستی در افغانستان ابراز نگرانی کردند، افزودند که برگزاری جلسات مشترک وزیران خارجه‌ی کشور‌های همسایه به منظور افزایش هم‌آهنگی در امر مبارزه با تروریسم و ایجاد ثبات در افغانستان یک امر ضروری‌است.

آنان بر عدم دخالت بیگانگان در مسایل کشور‌های منطقه به منظور ایجاد امنیت پایدار تاکید کردند.

هم‌چنان رییسان جمهور ایران و تاجیکستان در این دیدار بر ارتقای سطح هم‌کاری‌های تجاری و اقتصادی و افزایش تعاملات ایران و تاجیکستان در سازمان‌های بین‌المللی تاکید کرده‌اند.

این در حالی‌است که با تسلط گروه طالبان بر افغانستان، شماری از کشورهای همسایه به‌ویژه ایران، پاکستان، تاجیکستان، روسیه و هند بارها از افزایش قاچاق مواد مخدر و گسترش فعالیت‌های تروریستی نگرانی‌های شان را مطرح کرده‌اند.

گفتنی‌ست که پیش از این سازمان ملل طی یک گزارش اعلام کرده‌بود که فعالیت و سرباز‌گیری گروه داعش در افغانستان تحت تسلط گروه طالبان افزایش یافته‌است.

در همین حال، گزارشات حاکی از آن‌ست که با تسلط گروه طالبان بر افغانستان تاجیکستان پاسگاه‌های امنیتی خود را در مرز با این کشور افزایش داده‌است.