فرمانده‌ی طالبان از مردم افغانستان خواست با این گروه یک‌جا شوند تاجیکستان را فتح کنند

خبرگزاری راسک: یک فرمانده‌ی گروه طالبان با نشر نوار تصویری می‌گوید که طالبان به شهر دوشنبه، پایتخت تاجیکستان، حمله خواهند کرد.
این فرمانده طالبان که اسم و جزییات بیش‌تری در مورد وی در دست نیست، خطاب به امام‌علی رحمان، رییس‌جمهوری تاجیکستان می‌گوید: «ما روزی داخل شهر دوشنبه، پایتخت تاجیکستان، خواهیم شد و نخواهیم گذاشت که به ظلم جاری خود ادامه دهید.»
این فرمانده‌ی طالبان تاکید می‌کند که نظام تاجیکستان اسلامی نیست و نیاز است اسلامی شود و مردمش نیز هدایت گردد.
در این نوار که زمان دقیق ضبط آن معلوم نیست، فرمانده‌ی گروه طالبان ادعا کرده است: «ما روز به روز در حال پیش‌رفت هستیم.»
او گفته که تاجیکستان در پهلوی افغانستان و در تیررس است و هروقت بخواهند به دوشنبه میایند.
او هم‌چنین در این نوار تصویری می‌گوید که از سایر شهروندان افغانستان دعوت می‌کند تا که با آن‌ها علیه کشور تاجیکستان یک‌جا شوند.
فرمانده طالبان تاکید می‌کند جهاد فرض است و بالای تاجیکستان باید جهاد صورت بگیرد. این عضو گروه طالبان در حالی از ظلم در تاجیکستان حرف می‌زند که اعضای این گروه خود حقوق هیچ یک از شهروندان افغانستان را رعایت نمی‌کنند.
پیش‌تر، منابع گفتند که اعضای گروه طالبان در استان تخار بر یک دختر ۱۳ ساله تعرض جنسی کرده و سپس او را سر بُریده‌اند.
طالبان پس از تسلط بارها بالای شهروندان کشور ظلم کرده‌اند، اما با این وجود، تاجیکستان را اخطار داده‌اند.
مدتی پیش امان‌الدین، فرمانده طالبان، گفت اگر مقامات این گروه بگذارند کولاب و بدخشان تاجیکستان را بزودی می‌گیرد.