افزایش اخراج مهاجران افغانستانی از تاجیکستان

خبرگزاری راسک: شماری از مهاجران افغانستانی در تاجیکستان به رسانه ها گفته‌اند که دولت این کشور روند اخراج مهاجران افغانستانی را تشدید کرده است. آنها تأکید دارند که حتی مهاجرانی که دارای مدارک قانونی و ثبت‌نام از آژانس پناهندگان سازمان ملل هستند، تحت تأثیر این روند قرار گرفته‌اند.
مهاجران افغانستانی می‌گویند که در روزهای اخیر، دولت تاجیکستان تعداد زیادی از افغانستانی ها را بدون دلیل مشخص اخراج کرده است. به گفته آنها، بسیاری از مهاجران به دلیل ترس از بازداشت و اخراج، از خانه‌های خود خارج نمی‌شوند. آنها همچنین تأکید کرده‌اند که دولت تاجیکستان برخلاف استراتژی‌های اتخاذشده در ایران و پاکستان، بدون هشدار قبلی و به‌طور ناگهانی روند بازداشت و اخراج مهاجران افغانستانی را در سراسر کشور آغاز کرده است.
آژانس پناهندگان سازمان ملل متحد در تاریخ نهم دلو اخراج اجباری پناهجویان افغانستانی از تاجیکستان را غیرقانونی دانسته و خواستار توقف آن شد. این سازمان اعلام کرد که در دسامبر ۲۰۲۴، دست‌کم ۸۰ پناهجوی افغانستانی که بیشتر آنها دارای اسناد اقامت معتبر بودند، از تاجیکستان اخراج شدند.
این سازمان پیشتر تأکید کرده بود که اخراج پناهجویانی که در معرض خطر شکنجه یا سایر نقض‌های جدی حقوق بشر در کشور مبدا قرار دارند، مخالف قوانین پناهندگی تاجیکستان است. طبق گزارش‌ها، تا پایان سال ۲۰۲۴، تقریباً ۹ هزار پناهجوی افغانستانی در تاجیکستان حضور داشتند.