رقابت همسایه‌ها در اخراج مهاجران؛ تاجیکستان روند بازداشت و اخراج را آغاز کرد

خبرگزاری راسک: شماری از مهاجران افغانستانی در تاجیکستان گفته اند که پولیس روند بازداشت مهاجران را تشدید کرده و در چند روز گذشته ده‌ها تن بازداشت و زندانی شده اند.
برخی رسانه‌ها به نقل از مهاجران افغانستانی مقیم شهر دوشنبه، پایتخت تاجیکستان گزارش کرده اند که دولت به آنان ۱۵ روز مهلت داده است تا این کشور را ترک کنند.
به گفته مهاجران افغانستانی در تاجیکستان، پولیس افرادی که اسناد و مدارک قانوی اقامت در آن کشور دارند را نیز بازداشت کرده است.
به اساس آمارهای که دولت تاجیکستان و کمیساریای عالی سازمان ملل در امورپناهندگان، ارائه کرده، نزدیک به ۱۵هزار شهروند افغانستان در تاجیکستان پناهنده هستند.
تاجیکستان از کشورهای در آسیای میانه است که بیشتر مهاجران افغانستانی که قصد رفتن به کشورهای اروپایی و کانادا را دارند، برای پیش‌برد و بررسی پرونده‌های مهاجرتی شان، به تاجیکستان می‌روند.
شمار قابل توجهی مهاجران افغانستانی در تاجیکستان را، کارمندان دولت پیشین افغانستان‌ تشکیل می‌دهند که پس از سقوط جمهوریت، به‌دلیل تهدید و پیگرد از سوی طالبان، به این کشور پناه آورده‌اند.
تشدید روند بازداشت‌های مهاجران افغانستانی، از سویی دولت تاجیکستان، آن هم افرادی که اسناد قانونی اقامتی دارند، می‌تواند زنگ خطری برای مهاجرانی باشد که در انتظار صدور ویزای شان از سویی کشورهای اروپایی و کانادا هستند، پنداشته شود.
این در حالی است که ایران و پاکستان نیز فشارهای فزاینده‌ای را بر مهاجران افغانستانی وارد کرده و روزانه هزاران تن را از خاک خود اخراج می‌کنند.
در پهلوی سایر چالش‌ها و مشکلاتی که مهاجران اخراج شده افغانستانی با آن‌دست و پنجه نرم می‌کنند، انتقام گیری طالبان نیز از میان آنان به ویژه افرادی که در صفوف نیروهای ارتش و پولیس حکومت پیشین کار کرده بالقوه و با جدیت وجود دارد.
تاکنون چندین مورد از خشونت، آزار، و حتی قتل افراد بازگشتی توسط طالبان از ولایت‌های مختلف افغانستان گزارش شده است. منابع در ولایت‌های مختلف افغانستان از بازداشت شماری از نیروهای امنیتی حکومت پیشین پس از بازگشت خبر داده اند.
منابع در ولایت پنجشیر به رسانه‌ها گفته اند، در جریان ماه جوزای سال جاری، طالبان دست‌کم ۲۰ جوان را که به‌تازگی از ایران برگشته بودند، به اتهام همکاری با جبهه‌های ضد خود را بازداشت کرده‌ است. به گفته منابع، این بازداشت‌ها در روستای زمان‌کور ولسوالی عنابه صورت گرفته است.
با این وجود اما، روند اخراج مهاجران از کشورهای ایران و پاکستان با گذشت هر روز شدیدتر می‌شود و به نظر می‌رسد که تاجیکستان این کشور همسایه شمالی افغانستان هم عزم خود را جرم کرده تا از قافله اخراج اجباری مهاجران افغانستانی عقب نماند.